Guddiga Madaxa-Bannaan ee Doorashooyinka Qaranka & Soohdimaha ayaa maanta kulan xog waraysi iyo wadatashi ah la yeeshay  haweenka Soomaliyeed. Kulanka oo ujeedkiisu ahaa sidii haweenka Soomaliyeed uga qeyb qaadan lahaayeen ololaha wacyigelinta dadwaynaha ee doorashooyinka ayaa waxaa ka soo qayb galay aqoon yahanka, hoggaanka, dhalinyarada iyo waxgaradka haweenka Soomaliyeed qayb ka mid ah ee u qareema xuquuqda dumarka.

Guddoomiyaha Guddiga Md. Abdikarim Ahmed Hassan iyo Ku xigeenka Guddoomiyaha Md Saadiq Abshir Garaad oo ay weheliyaan xubno ka mid ah Guddiga ayaa warbixinno kala duwan ka dhagaystay haweenka. Waxayna bogaadiyeen sida ay haweenka uga go’an tahay inay qaataan doorkooda sidii dalka looga hirgelin lahaa doorasho qof iyo cod ah.

Guddiga ayaa dhankooda ballan qaaday inuu la tashado dhammaan qaybaha kala duwan ee bulshada, si gaar ahna u tixgeliyo doorka haweenka.